Arddangosfeydd Cyfredol
Cofio Menywod y Cocos
Mae arddangosfa wedi’i chreu i ddathlu hanes diwydiant cocos Pen-clawdd. Mae’r arddangosfa’n cynnwys ffotograffau, printiadau a phaentiadau ar fenthyg gan ddisgynyddion teuluoedd sefydledig y diwydiant. Ni welwyd llawer o’r eitemau hyn gan y cyhoedd o’r blaen. Bydd ffilm ddogfen fer yn ychwanegiad hyfryd i’r arddangosfa arbennig hon.
Gwnewch yn siŵr eich bod yn ymweld â ni i gael blas ar gysylltiad Abertawe â’r creadur dwygragennog hwn.
Amgueddfa Gyntaf Cymru
Sefydlwyd Sefydliad Brenhinol De Cymru neu RISW ym 1835. Agorodd yr aelodau sefydlu amgueddfa fawr gyntaf Cymru ym 1841. Amgueddfa Abertawe yw hon bellach, sy’n parhau i fod yn ganolfan diwylliant ffyniannus.
Mae llyfr a gyhoeddwyd yn ddiweddar yn gosod ei stori yn ei chyd-destun, yn lleol, yn genedlaethol ac yn rhyngwladol. Mae arbenigwyr blaenllaw yn disgrifio ffurfiant casgliadau niferus ac amrywiol yr Amgueddfa. Mae’r rhain yn cynnwys daeareg, hanes natur, botaneg, archeoleg, Eifftoleg, ffotograffiaeth, y celfyddydau addurnol, cofnodion hanesyddol, darnau arian, mapiau a gwisgoedd.
Mae’r amgueddfa wedi cael ei gweithredu gan Gyngor Abertawe ers dechrau’r 1990au. Fodd bynnag, mae’r RISW yn dal i fod yn grŵp gweithgar ac yn gefnogwyr cryf i’r amgueddfa fel grŵp ei ffrindiau. Mae’r arddangosfa hon yn dathlu eu llyfr newydd a’n treftadaeth ryfeddol. Mae’r arddangosfa hon yn cynnwys eitemau allweddol o gasgliadau’r amgueddfa, sydd wedi’u hamlygu yn y llyfr. Mae rhai o’r gwrthrychau yn cael eu harddangos am y tro cyntaf.
“… in the late 1940s and 1950s the view of Swansea from the East was arresting to put it mildly. Across the foreground lay the lunar desolation of Landore and Llansamlet.
Beyond, the shattered town centre was being rebuilt with a pretentiousness totally lacking in character … Yet the town was a nest of singing birds. Its most famous son described it as the most romantic place he knew.”
Mr. Rollo Charles.
Mae Abertawe wedi gweld llawer o newidiadau drwy gydol ei hanes, a gwelwyd rhai o’r newidiadau mwyaf arwyddocaol yn yr 20fed ganrif. Dechreuodd cynlluniau ar gyfer moderneiddio gyda’r rhaglen ‘Homes For Heroes’ ac adeiladu Neuadd y Dref. Yna roedd y dinistr a achoswyd gan y Blitz yn ystod yr Ail Ryfel Byd yn golygu bod angen ailadeiladu’r ganolfan, ac nid yn ddymunol yn unig. Yn agor y gwanwyn hwn, mae ‘Abertawe’r Ugeinfed Ganrif’ wedi’i hysbrydoli gan archifau ffotograffig prin eu gweld gan bobl a gofnododd y newid o dref gythryblus i ddinas obeithiol. Mae’r amgueddfa wedi agor ei chasgliad o arteffactau ac effemera i’w harddangos ochr yn ochr â’r tystion hyn o newid. Mae’n stori na ellir byth ei chwmpasu’n llwyr, ond gobeithiwn y gall roi cipolwg bach hynod ddiddorol ar y ‘nest of singing birds.’
Bydd y prosiect newydd a chyffrous hwn yn archwilio treftadaeth chwaraeon gyfoethog Abertawe a’i heffaith ar ddiwylliant a chymuned y ddinas. Drwy weithio gydag ystod amrywiol o bobl o bob cwr o’r ddinas, byddwn ni’n helpu i adrodd straeon arweinwyr ein cymunedau, eiconau chwaraeon, ac is-ddiwylliannau Abertawe gan holi pam fod chwaraeon mor bwysig i’n hymdeimlad o gymuned, sut mae’n effeithio ar ein bywydau beunyddiol a beth yw ei effaith ar ein llesiant a’n hymdeimlad o berthyn?
Bydd Taliesin ac aelodau’r gymuned leol a myfyrwyr yn coladu arddangosfa o arteffactau a ffotograffau i helpu i adrodd ein stori gyfoethog leol, gan ymddangos yn Amgueddfa Abertawe, Oriel Elysium, a Chanolfan Gelfyddydau Taliesin.
Hanes Naturiol Iawn
Mae gan bobl ddiddordeb diamheuol mewn natur. Dangosir hyn yn glir drwy amrediad ein casgliad hanes natur. O blanhigion wedi’u sychu i chwistlod wedi’u gwasgu, mae gan yr amgueddfa gyfoeth o fflora a ffawna. Er nad oes angen casglu a chadw sbesimenau astudiaethau natur fel hyn mwyach, mae llawer i’w ddysgu o hyd am yr hyn a ysgogodd yr arfer gwreiddiol.
Arddangosfeydd sydd ar ddod
Cofrestrwch ar gyfer ein cylchlythyr i dderbyn newyddion am y digwyddiad i’ch mewnflwch.
